SWELLENDAM – Swellendam Munisipaliteit het formeel beswaar teen Eskom se voorgestelde 10,5%-verhoging in elektrisiteitstariewe aangeteken. Die beswaar is by die National Energy Regulator of South Africa (NERSA) ingedien.
Volgens uitvoerende burgemeester Francois du Rand sal die voorgestelde verhoging ’n verdere finansiële las plaas op huishoudings, boere en besighede in landelike gebiede.
“Ons inwoners staar reeds stygende tariewe, voortgesette beurtkrag en ’n swak ekonomie in die gesig. Nog ’n groot verhoging is eenvoudig onredelik,” het Du Rand gesê.
Die munisipaliteit se voorlegging wys daarop dat Eskom se jongste finansiële verslae verbeterde prestasie toon, wat volgens die munisipaliteit vrae laat ontstaan oor die noodsaaklikheid van verdere tariefverhogings.
Die munisipaliteit waarsku ook dat stygende grootmaat-elektrisiteitstariewe plaaslike owerhede in ’n moeilike posisie plaas.
“Wanneer Eskom grootmaattariewe skerp verhoog, word munisipaliteite gedwing om hul eie tariewe te verhoog. Dit maak elektrisiteit minder bekostigbaar vir inwoners en kan lei tot hoër vlakke van wanbetaling, wat weer verdere druk op munisipale finansies plaas.”
Du Rand het beklemtoon dat bekostigbare elektrisiteit noodsaaklik is vir die volhoubaarheid van landbou, toerisme en klein besighede in landelike gebiede.
Die munisipaliteit het NERSA versoek om Eskom se voorgestelde verhoging te verwerp en die tariefaansoek te heroorweeg. Volgens die munisipaliteit behoort daar ook groter konsultasie met munisipaliteite en ander rolspelers te wees om ’n meer regverdige en volhoubare tariefraamwerk te ontwikkel.
“’n Volhoubare elektrisiteitsprys moet ’n balans vind tussen Eskom se finansiële behoeftes en die ekonomiese realiteite waarmee huishoudings en munisipaliteite daagliks te doen het,” het Du Rand gesê.
