Barrydale Brande: So staan ‘n gemeenskap saam

‘n Brand wat einde 2024 groot verwoesting op die Cooke plaas in Barrydale gesaai het, het ook een van die mooiste gebare tot gevolg gehad.

Kort na die groot veldbrand het Hannette Cooke en ‘n groep besorgde inwoners besef dat die plaaslike brandweerdiens net eenvoudig nie die mannekrag het om die omgewing te beskerm nie.

Met die hulp van Johan Olivier van Montagu Volunteer Fire and Rescue het sy gou die belangrike rolspelers in die dorp saamgetrek en die eerste stappe is geneem om ‘n soortgelyke organisasie in Barrydale op die been te bring.

Ons word so goed deur die gemeenskap ondersteun en daarom het ons besluit om ook met liefde te deel

Cooke sal egter getuig dat die span, onder leiding van plaaslike boer Deon Van Tonder, nog nie daartoe in staat is om as ‘n eenheid brande te blus nie, maar die hoop is dat die organisasie voor die einde van die jaar behoorlik op die been sal wees.

Intussen begin die gemeenskap saamstaan – wel, ten minste as dit by die veiligheid van die dorp kom…

Hospice het harte van goud

Vir ‘n organisasie wat feitlik geen hulp van die regering (plaaslik en die VSA ingesluit) ontvang nie, bly fondsinsameling ‘n kopseer.

Barrydale Hospice is van donasies afhanklik en dit was daarom ‘n riem onder die hart dat hulle op 19 Maart sowat R20 000 se brandbestrydings toerusting toerusting aan Van Tonder se Vuurslim Span kon skenk.

Volgens Sr Nickie Crookes, Mediese Bestuurder, het Barrydale Hospice destyds die toerusting aangeskaf omdat dit wetlik van organisasies wat oor in-pasiënt eenhede beskik, vereis word.

“Ons wou graag hierdie eenhede oprig sodat pasiënte vir die laaste ses maande van hul lewens 24uur per dag onder ons sorg kan wees, maar ongelukkig was van die vereistes van so aard dat ons dit nie kon bekostig nie,” het Crookes verduidelik.

“Daardie droom was nie moontlik nie en ons het toe besluit om eerder die wooneenhede op ons perseel as normale huurhuise te gebruik sodat Barrydale Hospice sy onkostes kan dek.

Crookes het na die brande by Carel Strydom (voormalige brandweerman) verneem dat van die toerusting wat nodig is om toegang tot brandkrane in die dorp te kry nie beskikbaar was nie.

“Ek onthou toe dat ons hierdie boks in ons stoorkamer het en dat daar splinternuwe toerusting daarin is wat ons nooit sou gebruik nie.”

Crookes het die moontlikheid van ‘n skenking met die direksie van Barrydale Hospice bespreek en almal was dit eens dat dit beslis tot voordeel van die gemeenskap sou strek.

“Ons word so goed deur die gemeenskap van Barrydale ondersteun en daarom het ons besluit om ook met liefde te deel.”

Sy het verduidelik dat hoewel nie elke inwoner in die dorp al deur Hospice geraak is nie en dat almal nie noodwendig al hulle hulp nodig gehad het nie, maar dat ‘n brand op een of ander punt almal se lewens raak.

“Of dit nou ‘n hut, ‘n huis of ‘n plaas is, ‘n vuur kan groot lyding en verlies vir mense veroorsaak en die regte toerusting kan beslis ‘n verskil maak.

“Hierdie was ‘n uitstekende geleentheid vir ons om die selfde mense wat Barrydale Hospice altyd ondersteun ook te ondersteun.”

Foto: Greg Viljoen

Lees Ook: