“Woorde voel onvoldoende wanneer ek probeer beskryf wat ek gevoel het die oomblik toe daardie sleutels in my hande geplaas is. Dit was oorweldigende vreugde, diepe verligting en groot dankbaarheid – alles op een slag.”
Só het mev. Vanda Sakoor, skoolhoof van Suurbraak Primêre Skool, gereageer oor die nuwe Archway-stigting se saal wat op die skoolterrein opgerig is.
Die saal is een van 138 wat reeds deur die Archway Foundation gebou is. Die organisasie is in 2003 gestig met die doel om noodsaaklike fasiliteite vir onderhulpbronskole in die Wes-Kaap te voorsien. Die koste van sulke sale beloop tans tussen R10 miljoen en R12 miljoen of meer.
Fondse vir die bou van die sale word deur die stigting voorsien in vennootskap met die Wes-Kaapse Onderwysdepartement (WKOD), asook bydraes van skole waar moontlik.
Suurbraak Junior het self R250 000 tot hul saal bygedra.
“Ek is baie trots op daardie bydrae. Dit was vir ons belangrik dat dit nie net iets is wat vir ons gedoen word nie, maar iets waaraan ons self ook kon help bou,” het mev. Sakoor gesê.
Sy het tydens die oorhandiging teruggedink aan die jare voordat die saal gebou is: “Ek het aan elke kind gedink wat oor die jare in die versengende son of koue winterwind moes sit tydens byeenkomste.”
Sy is tot trane geroer toe sy die voltooide saal sien: “Stewig, mooi en behoort aan ons kinders. Dit is nie net ’n gebou nie. Dit is ’n belofte wat nagekom is aan ’n gemeenskap wat geduldig gewag en getrou bly glo het.”
Volgens haar sal die saal ’n blywende simbool wees van waardigheid en geleentheid vir leerders.
“Ons motto is ‘Bou met trots’ en hierdie saal beliggaam dit ten volle.”
John Matthews, uitvoerende hoof van die stigtermaatskappy Garden Cities, het gesê die impak van die projek is reeds sigbaar.
“Verbeterings in akademiese prestasie en moraal is duidelik waarneembaar by skole waar sale reeds gebou is. Onderwys is die sleutel tot stabiliteit en finansiële sekerheid in Suid-Afrika.”
Hy het bygevoeg dat die doel is om ongelykhede in die onderwysstelsel te help regstel en gelyke geleenthede vir alle leerders te skep.
Suurbraak Junior Skool is in 1988 in sy huidige vorm gestig en bedien tans 307 leerders met ’n personeel van 20. Vyf van die onderwysers is self voormalige leerders van die skool.
Mev. Sakoor, wat reeds 38 jaar in die onderwys is en die afgelope vyf jaar hoof van die skool is, het ook hulde gebring aan vorige hoofde wat jare lank vir die projek geveg het.
Sy het gesê dat die nuwe saal reeds ’n groot verskil maak in die daaglikse skoollewe, met aktiwiteite soos kooroefeninge, byeenkomste, dansklasse en skaak wat nou binne plaasvind.
Die skool beplan ook om die saal vir fondsinsamelings, ouervergaderings, afskeidseremonies en gemeenskapsinisiatiewe te gebruik.
Die saal het reeds ’n spilpunt geword vir buitemuurse aktiwiteite. Suurbraak Primêr is bekend vir sterk kulturele en sportdeelname, insluitend koor, dans, drama, kuns, wetenskapuitstallings en skaak.
Die skool se meisies se toutrekspan het Suid-Afrikaanse junior kampioene geword en goud verower – ’n hoogtepunt in die skool se geskiedenis.
Die skool neem ook deel aan rugby, netbal, vlugbal en skaak, met leerders wat die Overberg in streekscompetisies verteenwoordig.
Voormalige leerders bly ’n trotse deel van die skool se nalatenskap, met baie wat later self ouers word en hul kinders na dieselfde skool stuur.
Mev. Sakoor het haar dank uitgespreek teenoor die skenker van die projek en gesê die impak sal vir geslagte voelbaar wees:
“Dit is nie net ’n finansiële bydrae nie. Dit is ’n daad van geloof in ons kinders se toekoms.”
